Apple-ը միանգամից երկու նորություն է հայտնել իր սպառողներին։ Ընկերությունը հայտարարել է, որ նախատեսում է ընդլայնել iCloud-ի տվյալների ծայրից ծայր կոդավորման համակարգը։ Բացի դրանից, երաժշտական հավելված Apple Music-ում նոր թարմացում կլինի, որի շնորհիվ հավելվածը կարաոկեի գործառույթ կստանա։
Ընկերությունը հայտարարել է, որ կընդլայնի iCloud ծառայության տվյալների ծայրից ծայր կոդավորման համակարգը, որում կներառվեն տվյալների պատճենումերը (backups), լուսանկարները, նշումները, չատերի արխիվը և այլ ծառայություններ։
Ըստ մասնագետների՝ այս նախաձեռնությունը կարող է հետագայում էլ ավելի պաշտպանել օգտատերերի տվյալները, բայց նաև կարող է լարվածություն առաջացնել իրավապահ մարմինների հետ ողջ աշխարհում:
Անվտանգության մի քանի նոր գործիքների թվում է մի գործառույթ, որը կոչվում է «Տվյալների ընդլայնված պաշտպանություն» (Advanced Data Protection)։ Այն թույլ կտա օգտատերերին որոշակի տվյալներ ավելի ապահով պահել հաքերներից, կառավարություններից և լրտեսներից, նույնիսկ այն դեպքում, եթե Apple-ի տվյալների արտահոսք տեղի ունենա:
Այս փոփոխությունից հետո իրավապահ մարմինները չեն կարողանա այդ տվյալներին հասանելիություն ստանալ նույնիսկ դատարանից թույլտվություն ունենալու դեպքում: Ծայրից ծայր կոդավորման պարագայում նույնիսկ Apple-ը չի կարող մուտք գործել այդ տվյալներ․ դա կարող են անել միայն այդ տվյալներն ուղարկողն ու ստացողը: Արդյունքում, Apple-ը չի կարողանա կատարել իրավապահների պահանջները, եթե վերջիններս որևէ հետաքննության շրջանակում ընկերությունից պահանջեն իրենց տրամադրել ամպում պահվող այս տվյալները։
Apple-ը նախկինում կոնֆլիկտներ ունեցել է իրավապահ մարմինների հետ, որոնք փորձել են հասանելիություն ստանալ որոշ օգտատերերի սարքերի տվյալներին։ Նման դեպք գրանցվել է 2015-ին, երբ Հետաքննությունների դաշնային բյուրոն փորձել էր կոտրել Կալիֆոռնիայի Սան Բերնարդինո քաղաքում տեղի ունեցած հարձակման մասնակիցներից մեկի մեկի iPhone-ը։
Ինչպես նշում է CNN-ը, վերջին տարիներին Apple-ն ավելի ու ավելի մեծ ուշադրություն է դարձնում օգտատերերի տվյալների գաղտնիությանը։ Ընկերությունը գործարկել է հատուկ ֆունկցիա, որը նախատեսված է լրագրողներին և իրավապաշտպաններին լրտեսող ծրագրերից պաշտպանելու համար:
Ընկերությունը նշել է, որ այս վերջին թարմացումն արվում է չարագործների կողմից օգտատերերի տվյալներին սպառնացող «ավելի բարդ և համալիր» վտանգների դեմ պայքարելու շրջանակում, ինչպես նաև հաշվի առնելով տվյալների արտահոսքերի աճը վերջին շրջանում։
Apple-ը նաև հայտարարել է իր Apple Music երաժշտական ծառայության թարմացման մասին. նոր Sing գործառույթը թույլ կտա սթրիմինգային հարթակը որպես կարաոկեի գործի օգտագործել:
«Apple Music-ում բառերի որոնումը մշտապես եղել է մեր ծառայության ամենահայտնի գործառույթներից մեկը, ուստի մենք ցանկանում էինք հետագայում զարգացնել այս առաջարկը՝ երգելու միջոցով երաժշտության մեջ էլ ավելի ներգրավվածություն ապահովելու համար»,- ասել է Apple-ի Apple Music և Beats ծառայությունների հարցերով փոխնախագահ Օլիվեր Շուսերը:
Apple Music Sing-ը թույլ կտա օգտատերերին ընտրել երգի բնօրինակ աուդիոթրեքի ձայնի մակարդակը, խառնել աուդիոթրեքները միմյանց հետ և միևնույն երգը երգել մի քանի ձայնով: Հատուկ ալգորիթմը թույլ կտա դասավորել երաժշտության հետ սինխրոնիզացված տեքստը՝ հաշվի առնելով կատարողների քանակը և առանձին աուդիոթրեք հատկացնել բեքվոկալի համար:
Apple Music Sing գործառույթը հասանելի կլինի դեկտեմբերի վերջին Apple Music-ի բաժանորդների համար ողջ աշխարհում: Նոր գործառույթի աջակցություն ունեն iPhone-ների, iPad-ների և նոր Apple TV 4K-ի հավելվածները։
ամիս
շաբաթ
օր