6500 մԱ/ժ, մեծ էկրան, Snapdragon 8 Gen 3-ի ամենահզոր տարբերակը․ Red Magic 9S Pro-ն ներկայացվել է միջազգային շուկա

Red Magic ապրանքանիշը միջազգային շուկա է ներկայացրել իր ամենաթարմ խաղային առաջատար սմարթֆոնը՝ Red Magic 9S Pro-ն: Նախնական պատվերների ընդունումը կսկսվի 2024-ի հուլիսի 23-ից, հաճախորդները կսկսեն ստանալ իրենց պատվերները հուլիսի 30-ից, իսկ բաց վաճառքը կսկսվի հուլիսի 31-ից:

Եվրոպայի և Չինաստանից դուրս մի շարք այլ տարածաշրջանների համար Red Magic 9S Pro-ն հասանելի կլինի 650 դոլարից սկսած 12 ԳԲ օպերատիվ և 256 ԳԲ ներկառուցված հիշողությամբ տարբերակի համար։ Այն հասանելի է սպիտակ և սև տարբերակներով։ 16 ԳԲ/512 ԳԲ հիշողությամբ տարբերակն առաջարկվում է մի փոքր այլ դիզայնով և արժե 800 դոլար։ Առաջին հաճախորդներին տրվում է $30 զեղչ:

Red Magic 9S Pro-ն կառուցված է Qualcomm Snapdragon 8 Gen 3 SoC-ի ամենահզոր տարբերակի վրա, որն Antutu-ում ամենաբարձր արդյունքներն է գրանցել: Ըստ արտադրողի՝ սա աշխարհում առաջին սմարթֆոնն է, որը հիմնված է Snapdragon 8 Gen 3 առաջատար տարբերակի վրա, սակայն դրա հիման վրա արդեն արտադրվում է Samsung Galaxy S24-ը, թեև այն ունի այլ անվանում՝ Snapdragon 8 Gen 3 for Galaxy։

Հիմնական բնութագրերի թվում են 6,8 դյույմանոց AMOLED էկրանը՝ բացարձակապես առանց կտրվածքների, 16 Մպ առջևի տեսախցիկը, որը թաքնված է Full HD+ (1116 x 2480 պիքսել) էկրանի տակ, եռակի հիմնական տեսախցիկը (50 Մպ, 50 Մպ և 2 Մպ), 6500 մԱ/ժ հզորությամբ մարտկոցը՝ 80 վտ լիցքավորման աջակցությամբ։