Մագնիսական դաշտը անհրաժեշտ է Երկրի վրա կյանքը պահպանելու համար, բայց մենք չենք կարող տեսնել կամ լսել այն: Թեև ոչ, լսել մենք արդեն կարող ենք: Դանիայի տեխնիկական համալսարանի գիտնականները ESA Soundcloud-ի պաշտոնական էջում հրապարակել են աուդիո ձայնագրություն, որը կարող է պատկերացում տալ, թե ինչպես է հնչում մեր մոլորակի մագնիսական դաշտը:
Նման աուդիո ձայնագրություն ստանալու համար մասնագետները ձայնի են վերածել Եվրոպական տիեզերական գործակալության (ESA) երեք արբանյակների կողմից չափված մագնիսական ազդանշանները:
Արդյունքը բավականին տպավորիչ է ստացվել։ Մեզ պաշտպանող մագնիսական դաշտը, պարզվում է, բավականին վախեցնող է հնչում: Ստացված ձայները նկարագրելը բավականին դժվար է։ Այդուհանդերձ, եթե լսել եք աուդիո ձայնագրությունը, ապա մեր ֆեյսբուքյան էջում պատմեք, թե ինչ ասոցիացիաներ է այն ձեր մեջ առաջացնում։
Նույնիսկ եթե դուք հեռու եք գիտությունից, հավանաբար մեկ անգամ չէ, որ լսել եք մագնիսական դաշտի մասին. հենց դրա ազդեցության տակ է, որ աշխատող կողմնացույցի սլաքը միշտ ուղղված է դեպի հյուսիս:
Ենթադրվում է, որ Երկրի մագնիսական (կամ գեոմագնիսական) դաշտը ի հայտ է եկել 4,2 միլիարդ տարի առաջ։ Այն առաջանում է ներերկրային աղբյուրներից և համարվում է մոլորակի վրա կյանքի գոյության կարևոր պայմաններից մեկը. մթնոլորտի հետ մեկտեղ մագնիսական դաշտը Երկիրը պաշտպանում է տիեզերական ճառագայթների և արևային քամու կործանարար ազդեցությունից։
Մագնիսական դաշտը թափանցում է Երկրի բոլոր երեք թաղանթները՝ լիթոսֆերա, հիդրոսֆերա և մթնոլորտ: Այն ազդում է բուսականության, բոլոր կենդանի էակների, ինչպես նաև անշունչ բնության վրա. հենց դա է մագնիսացնում օգտակար հանածոներն ու ապարները:
Մագնիսական դաշտը ազդում է նաև կլիմայի և եղանակի վրա. այս դաշտի ինտենսիվության փոփոխությունները կարող են հանգեցնել ոչ միայն ջերմաստիճանի, մթնոլորտային ճնշման և տեղումների հաճախականության տատանումների, այլև ուժեղ քամիների, փոթորիկների և այլ բնական աղետների առաջացման:
Գիտնականները ծրագրում են 2022 թ․ հոկտեմբերի 24-ից հոկտեմբերի 30-ը Դանիայի մայրաքաղաք Կոպենհագենի հրապարակներից մեկում բարձրախոսներով միացնել մագնիսական դաշտի ձայներով այս ձայնագրություն։ Նրանք հույս ունեն այս կերպ մարդկանց հիշեցնել Երկրի համար մագնիսական դաշտի կարևորության մասին, քանի որ դրանից է կախված մոլորակի վրա կյանքի գոյությունը։
ամիս
շաբաթ
օր