Forbes-ի ֆինտեխ ցուցակում ընդամենը 5 կրիպտոընկերություն է մնացել. որո՞նք են դրանք և ի՞նչ է հայտնի դրանց մասին

Անցյալ տարի Forbes-ի 50 առաջատար ֆինտեխ ընկերությունների ցանկը ներառում էր ինը կրիպտոընկերություն, այդ թվում՝ սնանկ FTX-ը։ 2022-ը, սակայն, ամենևին էլ ամենահաջող տարին չէր կրիպտոինդուստրիայի համար․ այս տարի ցուցակում մնացել է ընդամենը հինգ կրիպտոընկերություն։

Հետաքրքիր է, որ ցուցակում մնացած հինգ նախագծերից և ոչ մեկի հիմնական բիզնեսն առևտուրը չէ: Դրանք բոլորն աշխատում են կրիպտովերլուծության, ենթակառուցվածքների ոլորտում, ինչպես նաև ծառայություններ են մատուցում ոլորտին, հաղորդում է РБК-ն։

Ո՞ր ընկերություններն են ընդգրկված 2023-ի ցուցակում և ինչո՞վ են դրանք հայտնի։

Alchemy

Ստարտափ Alchemy-ն աշխատում է տվյալների ենթակառուցվածքի հետ, որն աջակցում է առաջատար բլոկչեյն խաղերի, ֆինանսական հավելվածների և NFT հարթակների մեծ մասը: Այսօր ստարտափը գնահատվում է 10,2 միլիարդ դոլար, իսկ դրա հաճախորդների թվում են վճարումների ծառայությունների հսկա Stripe-ը, Gucci-ի նորաձեւության տունը և Fox մեդիա հոլդինգը:

Chainalysis

Կրիպտոքրեագիտական Chainalysis ընկերությունը հետևում է գործարքներին, հայտնաբերում խարդախությունները և հետաքննում թվային ակտիվների հետ կապված հաքերային հարձակումները: Ընկերությունն այժմ գնահատվում է 8,6 միլիարդ դոլար, իսկ հաճախորդների թվում են BNY Mellon-ը և Barclays-ը և նույնիսկ ԱՄՆ Ներքին եկամուտների ծառայության (IRS) քրեական հետախուզության բաժինը:

Fireblocks

Fireblocks-ը տրամադրում է կրիպտոակտիվների պահպանման ծառայություններ: Այս ծառայությունը գնահատվում է 8 միլիարդ դոլար։ Այն համագործակցում է ավստրալական ANZ և NAB բանկերի հետ՝ ստեյբլքոյններ գործարկելու համար, ինչպես նաև BNY Mellon-ի և ամերիկացի ֆուտբոլիստ Թոմ Բրեդիի Autograph ստարտափի հետ։

Paxos

Paxos-ը, որը Binance-ի համար թողարկել է BUSD ստեյբլքոյնը, կրիպտոարժույթների առևտրի տեխնոլոգիա է տրամադրում PayPal, Venmo, Interactive Brokers, Mastercard և այլ խոշոր ընկերությունների: Ներկայումս այն գնահատվում է 2,4 միլիարդ դոլար:

TaxBit

TaxBit ստարտափը ԱՄՆ Ներքին եկամուտների ծառայության գործընկերն է, որն օգնում է հարկեր հավաքել հարկերից խուսափողներից: Բացի ԱՄՆ Ներքին եկամուտների ծառայությունից, TaxBit-ն ունի 45 հաճախորդ, այդ թվում՝ PayPal-ը, Kraken-ը և TurboTax-ը, որոնց օգտատերերին ստարտափն օգնում է լրացնել հարկային հայտարարագրերը կրիպտոարժույթով: Ընկերությունը նախատեսում է իր Tactic կրիպտոհաշվապահական հարթակն օգտագործել  նաև Google-ի, Ralph Lauren-ի և Fox News-ի հետ աշխատելու համար ընկերության հաշվեկշռում թվային ակտիվներին հետևելու նպատակով: TaxBit-ը գնահատվում է 1,3 միլիարդ դոլար։ Հետաքրքիր է, որ այս ընկերությունը դարձել է միակ նորեկը Forbes-ի տարեկան վարկանիշում։